Interessada u interessà dad emprender «il pli interessant gieu da cartas»? Mirveglia co ch'ins dat in bun scart?

La Giuventetgna Rumantscha envida ils 11 da favrer 2012 ad in suentermezdi da troccas. Il curs è avert per in e scadin che vul gugent emprender d'enconuscher quest bel gieu sursilvan. Il curs ha lieu en il Hotel Seehof a Laax e cumenza las 13.15 uras. Suenter il scart offrescha la GiuRu a las participantas ed als participants ina tschaina da troccas.

Annunzias per telefon ni SMS: 079 479 98 87 (Sandro Buchli) u per e-mail a giuru@giuru.ch
Cura? Ils 11-2-2012 las 13.15 uras
Nua? Hotel Seehof a Laax
Per tgi? Per principiantas e principiants da tut las annadas

La GiuRu envida gia per la terza giada uniuns da giuventetgna da minoritads europeicas ad ina emna da skis e snowboard. Ils Croats dil Burgenland (Austria), ils Fris dal Nord (Germania) ed ils Nordschleswigers (Danemarc) visitan nus il mars. Nus mussain ad els co ils Rumantschs vivan en las muntognas. Els vegnan ad emprender dad ir cun skis, aissa e da far passlung. Mo betg avunda. Sper il sport alpin vegnin nus a mussar ad els la cultura dals Rumantschs, cun excursiuns, referats e tratgas tipicas. 

Per che questa emna daventia in success essan nus dependents da vus: Nus tschertgain participants che san ir cun skis u cun aissa e che han gust dad emprender ad enconuscher giuvenils dad autras minoritads e passentar ina bella emna da skis e cultura cun la GiuRu. Il snowexchange ha lieu a Segnas/Mustér dals 18 enfin ils 24 da mars 2012. Per plaschair t'annunzia tar snowexchange@giuru.ch.

Stimada suprastanza,
stimà secretari general da la Lia Rumantscha

Dacurt ha la GiuRu, la Giuventetgna Rumantscha, gì ina radunanza generala extraordinaria tar la tematica da l’introducziun dal rumantsch grischun en scola.

La GiuRu è fitg trumpada da la posiziun da la Lia Rumantscha en chaussa. Gia avant onns han las delegadas ed ils delegads da la Lia Rumantscha decidì ed adina puspè confermà che la Lia Rumantscha duai promover l’introducziun dal rumantsch grischun en scola. Tuttina na steva la Lia Rumantscha uffiziala l’ultim onn betg pli davos questa finamira. Na, ella ha empruvà da «moderar» tranter las posiziuns. Questa emprova po ord motivs evidents be vegnir titulada sco ridicula.

Quels signals absolutamain nunchapibels han manà ad ina gronda malsegirezza en las regiuns e vischnancas da pionier, tge ch’è fitg deplorabel. Las persunas involvidas en quest process difficil avessan duvrà il sustegn da la Lia Rumantscha ils davos mais.

Perquai pretenda la GiuRu che la suprastanza e la direcziun da la Lia Rumantscha prendan puspè cleramain posiziun per l’introducziun dal rumantsch grischun scola sco finamira a media vista per tut las scolas rumantschas.

Era la GiuRu beneventa cumpromiss che pon schliar punctualmain malsegirtads e quitads tar las persunas pertutgadas. Dentant pretendain nus che la Lia Rumantscha tschertga quels adina cun la clera finamira da l’introducziun dal rumantsch grischun a media vista en tut las scolas rumantschas.

Cun amiaivels salids
La suprastanza da la GiuRu

Oz avant 20 onns è la GiuRu vegnida fundada a chaschun da la Scuntrada a Laax. Malgrà ch'i era in di fitg sulegliv èn var 30-40 giuvenils sa radunads ed han fundà nossa uniun. Grazia fitg, ina stupenta idea!

L’ultima sonda ha la Giuventetgna Rumantscha (GiuRu) gì ina radunanza generala extraordinaria. Il tema central da questa radunanza era l’introducziun dal rumantsch grischun en scola. Suenter discussiuns lungas davart reacziuns pussaivlas da la GiuRu ha la radunanza generala decidì unanimamain da sustegnair l’introducziun dal rumantsch grischun en scola e da prender mesiras per cuntanscher questa finamira. Ils preschents speran sin in futur en ina Rumantschia che scriva be pli en ina varianta e che po finalmain crescher ensemen pli fitg.

La radunanza ha exprimì gronda malcuntentientscha cun la proposta da la regenza davart la revisiun totala da la lescha da scola e refusa cleramain l’artitgel 34, alinea 4. La GiuRu beneventa buns cumpromiss e schliaziuns pragmaticas, dentant naginas che mainan puspè enavos en ils onns 1990 en las scolas.

La radunanza ha exprimì sia gronda dischillusiun davart la posiziun da la Lia Rumantscha. L’inactivitad da quella durant ils ultims mais, l’emprova ridicula da ’moderar’ tranter l’atgna oriunda posiziun e quella dals adversaris, è stada fitg problematica ils ultims mais per las vischnancas e regiuns da pionier ed ha ussa la finala manà a la midada da la posiziun da la regenza grischuna. Che la Lia Rumantscha sustegn ord motivs giuridics questa nova proposta è nunchapibel. La GiuRu chapescha che blers pioniers dal rumantsch grischun en scola han l’impressiun che la Lia Rumantscha banduna la via dal rumantsch grischun en scola. Perquai pretenda la GiuRu dal president e dal secretari general da la Lia Rumantscha ch’els conferman cleramain che la strategia da la Lia Rumantscha a lunga vista è anc adina l’introducziun dal rumantsch grischun sco lingua d’alfabetisaziun en tut las scolas rumantschas.

La GiuRu spera ch’ils deputads en il Cussegl grond surlavuran anc ina giada la proposta per la nova lescha da scola ed elimineschan l’alinea 4 da l’artitgel 34. Ultra da quai han ils preschents da la radunanza generala pretendì da la suprastanza dad evaluar tut las pussaivladads politicas e directdemocraticas per pudair intervegnir sch’ina tala lescha vegn approvada.

La GiuRu spera che la Rumantschia chatta ina via per tut las vischnancas rumantschas, mantegnend la visiun dal rumantsch grischun. Sin ils proxims milli onns rumantsch!

SUNS è in contest internaziunal per artistas ed artists che chantan en linguas minoritaras. L’ediziun da quest onn ha lieu ils 17 da settember 2011 en La Fermata a Falera. Ils victurs da SUNS pon sa participar a LIET INTERNATIONAL 2011, la pli impurtanta concurrenza da musica per minoritads linguisticas en l’Europa.

Ils 16 da settember 2011 datti anc in’occurrenza supplementara EXCLUSIVAMAIN per bands rumantschas – quai eveniment è a medem temp era la festa per il 20avel giubileum da la GiuRu. La band che gudogna quella saira sa qualifitgescha sco ulteriura band per la concurrenza dals 17 da settember 2011.

Dapli infurmaziuns chattais vus en il PDF agiuntà.

Igl è puspè uschia lunsch: la radunanza generala da la GiuRu e da PUNTS stat avant l'isch. La radunanza generala ha lieu quest onn sonda, ils 12 da mars 2011. Quest onn s'entupain nus en il Grischun central, a Casti (Tiefencastel). La radunanza cumenza las 16:00 en l'Hotel Albula. Suenter la radunanza datti ina tschaina cuminaivla e star en cumpagnia. Deplorablamain n'avain nus betg pudì organisar in dormitori.

Tractandas:

1. Salid
2. Elecziun d'in dumbravuschs
3. Approvaziun da la glista da tractandas
4. Protocol da la RG 2010
   Remartga: Nus avain decidì da na pli leger avant il protocol durant la radunanza generala. Infurmaziuns avais vus retschert per posta; uschiglio ans contactai curt per e-mail.
5. Rapport annual da la GiuRu 2010
6. Rendaquint 2010 e preventiv 2011 da la GiuRu
7. Rapport annual e quint da las PUNTS
8. Elecziuns per la suprastanza da la GiuRu
9. PUNTS: Tge datti nov?
10. GiuRu: Plans e projects 2011/12
11. Varia

Sco che ti pos leger en las tractandas tschertgain nus dus novs suprastants. Sche ti has interess, t'annunzia tar nus! Nus ans legrain sin novas suprastantas e novs suprastants. Nus avessan grond plaschair sche ti fissas da la partida. Scriva simplamain in postel a giuru@giuru.ch u in sms al numer 077 / 429 94 42.

Tranter venderdi e dumengia è la GiuRu sin via cun in pitschen bus en tut ils territori rumantsch per rimnar las «visiuns rumantschas» da la giuventetgna Rumantscha. Nossas impressiuns rimnadas vegnan a dar il material per la proxima ediziun da PUNTS.

Has gust da viandar cun nus? Ans telefonescha u scriva: 077 / 429 94 42.

Vul savair nua che nus essan actualmain? Suonda noss viadi sin twitter u facebook.

Tranter ils 12 ed ils 18 da settember ha lieu in'ulteriura giada il seminari d'atun da la GCEE (giuventetgna da cuminanzas etnicas europeicas) a Bleiburg / Pliberk tar ils Slovens en Carinzia, Austria. Il seminari stat sut il tema „We Do Not Fear. Minorities against Social Exclusion". A maun da lur atgnas experientschas vulan ils organisaturs sa deditgar a la dumonda, sco che la diversitad culturala e la plurilinguitad influenzeschan la vita dal mintgadi en Carinzia.

Sche ti has interess d'emprender d'enconuscher autras minoritads, da savair sco che questas vivan e funcziunan e da simplamain passentar in'emna incumparabla, scriva sin giuru@giuru.ch u telefona sin 079 390 94 66. En la delegaziun da la GiuRu datti anc dus plazzas libras.

Nus ans allegrain sin tai.

Charas commembras e chars commembers,

Qua puspè ina giada in'acziun speciala da la GiuRu be per tai!

Sonda, ils 5 da zercladur 2010 ha lieu a Falera la segunda ediziun dal "Falera fa canera". Ils emprims dus che scrivan in email a giuru@giuru.ch u tramettan in sms a 077 / 429 94 42 pudein nus metter sin la glista da giasts! T'annunzia pia!

Cun chars salids
tia GiuRu

Bainprest èsi puspè uschè lunsch: sonda, ils 8 da matg 2010 maina la GiuRu tras il legendar curs da rumantsch per na-rumantschs al SUFO a Son Gagl. Dapi intgins onns preschenta la GiuRu durant trais uras il rumantsch ed la cultura rumantscha per che noss participants che na san anc nagut dal rumantsch possian far ina giada enconuschientscha cun nossa lingua.

Perquai tschertgain nus anc persunas che avessan gust da giugar in di magistra u magister ed vegn cun nus a Son Gagl a preschentar il rumantsch? Has gust? Ans scriva in e-mail a giuru@giuru.ch u t'annunzia per telefon u SMS a 077 / 429 94 42.

Nus t’envidain cordialmain ils 13 da mars 2010 a Laax a la Radunanza Generala. La radunanza entschaiva las 16:15 en l’anteriur Hotel Arena Alva. Suenter la radunanza cun in pitschen snack giain nus sin las 19:00 uras a Flem per ina pitschna activitad sportiva. Guardai dad avair cun vestgadira in zic chauda. Tractandas:

1. Salid
2. Elecziun d’in dumbravuschs
3. Approvaziun da la glista da tractandas
4. Protocol da la RG 2009
   Remartga: Nus avain decidì da na pli leger avant il protocol durant la radunanza generala. Infurmaziuns avais vus retschert per posta; uschiglio ans contactai curt per e-mail.
5. Rapport da la GiuRu 2009
6. Rendaquint 2009 e preventiv 2010 da la GiuRu
7. Elecziuns
   Nus tschertgain anc adina in u dus novs suprastants! Has gust da t’engaschar en suprastanza? Lura t’annunzia! U ans propona persunas che fissan adattadas per la suprastanza.
8. PUNTS: Rapport & quint 2009
9. PUNTS: Sguard en il futur
   Era las PUNTS tschertgan anc ina nova chauredactura u in nov chauredactur. En cas che ti na t’es anc betg t’annunzià per in post en la suprastanza da la GiuRu è quai l’ideala pussaivladad da mussar tia creativitad rumantscha!
10. GiuRu: Plans e projects 2009/10
    Sche ils posts sura èn propi nagut per tai (propi betg?), pos era gugent far in per ponderaziuns davart projects che ti vesessas gugent da la GiuRu. Nus ans legrain da tias propostas.
11. Varia

Nus fissan leds sche ti pudessas t’annunziar per e-mail (giuru@giuru.ch) u cun tes telefonin (077 / 429 94 42). Ma sa chapescha pos ti era anc decider spontan ils 13 da mars da vegnir. E sche ti has collegas u amias ed amis che han interess vid la GiuRu mo n’èn anc betg commembers – nagin problem, als prenda cun tai!

Cordials salids
Tia suprastanza

La GiuRu dovra ideas.
La GiuRu dovra sustegn.
La GiuRu dovra glieud.
La GiuRu dovra tai.

Or da quel motiv envida la GiuRu tai e tut quellas e quels che han interess ad ina pitschna scuntrada informala en furma dad in apero.

L’idea è da rimnar ideas e propostas per l’onn 2010. A medem temp duai la scuntrada però er esser ina pussaivladad per vus dad emprender a conuscher meglier la GiuRu, da vegnir a savair tge che la GiuRu fa propi e natiralmain er da crititgar tge che na plascha betg.

Nus ans entupain en sonda, ils 21 da november, a las 17.30 en la Chasa Rumantscha a Cuira (Via da la Plessur 47). Ve e prenda cun tut tes collegas; tuttina sche commember da la GiuRu u betg.

Annunzias per plaschair a giuru@giuru.ch.

Per la seria «Istorgia(s) en pled e maletg» è il Museum Regiunal Surselva giast en las vischnancas. Ensemen cun in partenari local organisescha el occurrenzas divertentas cun ovras ord lur films rimnads, cun auturs renomads ed giasts interessants. Mintga seria d’occurrenzas è deditgada ad in auter tema impurtant per la Surselva. L’entschatta da quella seria deditgescha il MRS a las alps, als pasturs e lur istorgias.

Questa fin d'emna ha lieu en il Teatro Palamostre ad Udine (Italia) il mezfinal dal Minority Language Song Festival SUNS, ina concurrenza per giuvnas musicistas e giuvens musicists or da minoritads en l'Europa. Era qualifitgada per il mezfinal è ina Rumantscha. Cunter otg autras bands emprova Ursina Giger questa sonda da sa qualifitgar per il final.

Il prinzip dal SUNS (www.myspace.com/sunscontest) è fitg simpel. Giuvnas e giuvens che appartegnan ad ina minoritad en Italia, Slovenia, Austria o Svizra pon inoltrar chanzuns che vegnan suenter valitadas dad ina giuria. Las otg meglras bands sa qualifitgeschan per il mezfinal da quest fin d’emna. Ils dus vciturs pon suenter sa mussar al LIET International, al pli impurtnat festival da linguas minoritaras a Leeuwarden en Ollandia.

Ina dals mezfinalists è Ursina Giger da Mustèr cun sia Chanzun Vias. “Chejau sun da la partida en l'Italia è super, ma anc pli cool fiss il final en l'Ollandia”, di Ursina plain ambiziuns. Per cuntanscher questa finamira dovra ella era il sustgen dal public. Ultra da la giuria po er il public influenzar la qualificaziun per il final cun vuscher sur internet per lur candidats preferids. La concurrenza vegn transmess direct sin http://www.ondefurlane.eu, (sonda, ils 12 d’october, naven da las 21.00) nua ch'igl è pussaivel da sa participar a la votaziun.

Sustegn da giuven e vegl

Per Ursina Giger è il SUNS ina buna schanza per sa preschentar ad in public internaziunal. “Che jau ma participeschia, è stà cler per mai subit, cura che jau hai udì da questa concurrenza. Da chantar en questa furma cun giuvenils da tut l’Europa è propi ina super chaussa”. Uschia han la Giuventetgna Rumantscha e la Lia Rumantscha decidì da sustegnair Ursina Giger uschè bain sco pussaivel, per ch’ella e sia band possian reussir en l'Italia e bainprest preschantar musica rumantscha en il final, che ha lieu ils 31 d’october.

La Giuventetgna Rumantscha e la Lia Rumantscha tegnan ils poleschs, giavischan ad Ursina bun success e speran, che la Rumantschia n'emblidia betg da votar per la “speranza rumantscha” en il Minority Language Song Festival.

Cun la versiun 3.5 da Mozilla Firefox è era l'emprima giada cumparida la versiun rumantscha dal renomà navigatur.

Telechargia ed installescha anc oz!

Dapli infurmaziuns chattas sin la pagina www.software.rumantscha.ch. Fa era reclama sin Facebook per Firefox rumantsch, ve commember da nossa gruppa!

Vul guardar en il cudesch da telefon per rumantsch? Ussa pos far quai en l'internet. Dai inagada in sguard sin la pagina www.cudeschdatelefon.ch.

Finalmain èn las fotografias dal SnowExchange 09 a Vuorz en la rait. Guarda tge figura che nos giasts internaziunals han fatg sin las aissas, e sco che las GiuRuistas ed ils GiuRuists han mussà da sa mover sin la naiv. E betg d'emblidar il fenomenal concert dad Ursina Giger.

Scriva texts e chatta tes song tar il tema Alps - tuttina sche Rock ni musica classica! T'annunzia enfin ils prims da mars 2009 tar la concurrenza dad Arge Alp Sound e fin 15'000 Euro!

Dapli infos chattas sin www.argealpsound.org.

Per l'emna dals 26 da schaner enfin l'emprim da favrer 2009 ha la GiuRu envidà giuvens e giuvnas da differentas minoritads linguisticas al snowexchange. Quel ha lieu per la segunda giada a Vuorz en Surselva. Sin il program stattan ir cun skis / aissa, scarsolar, ir cun patins etc. Era la cultura rumantscha na dastga betg vegnir a la curta!

Has ti gust d'emprender d'enconuscher giuventetgna or da l'entira Europa? Has ti gia adina vulì mussar dad ir cun skis ad ina bella Ollandaisa u dad ir cun aissa ad in scharmant Austriac? T'annunzia sut: snowexchange@giuru.ch. In'emna plain sun & fun ta spetga a Vuorz.

Chars salids da tia GiuRu

La sonda passada èn delegadas e delegads da 20 uniuns da giuventetgna sa radunads a Cuira per lantschar l'organisaziun dad in inscunter da tut las uniuns da giuventetgna rumantschas. L'uniun Giuventetgna Rumantscha GiuRu aveva envidà tut las uniuns da giuventetgna rumantschas en il Marsöl per discutar las pussaivladads dad ina festa communabla da tut las giuventetgnas. La sonda ha la GiuRu pudì beneventar represchentants da las uniuns dad: Alvaschagn, Andeer, Bever, Breil, Cumbel, Dardin, Donat, Fuldera, Müstair, Riom-Parsonz, S-chanf, Salouf, Segnas-Acletta, Sta. Maria/Valchava, Strada/Martina, Suaraua, Tschierv, Vuorz e Zernez. Il team da la GiuRu che aveva envidà sa mussa «intgantà che tantas uniuns èn sa participadas». Quai motiveschia per organisar ina «festa da dimensiun istorica», «istorica» almain per la Rumantschia.

Passa 90 uniuns da giuventetgna

En tut il territori rumantsch datti passa 90 uniuns da giuventetgna che funcziuneschan tuttas sin nivel communal. Qua e là datti inscunters ed activitads communablas da singulas uniuns forsa perfin sur vals ora. «Ma sch'i reussescha a nus d'organisar in'occurrenza cun uniuns da giuventetgna ord tuttas vals rumantschas, da tut ils idioms, sche fiss quai insatge nov», di Oliver Nyffeler, president da la GiuRu che ha moderà la seduta ensemen cun Annatina Dermont.

La radunanza ha provocà discussiuns intensivas davart la furma da la festa. Il consens ch'ins ha chattà è ch'ins stoppia far «pass per pass», tschentar en il center l'inscunter da las differentas uniuns da giuventetgna, senza dentant sclauder giuvnas e giuvens che n'èn betg commembers dad uniuns da giuventetgna. In model favurisà è in di da gieus u ina concurrenza ed ina notg da concerts da bands rumantschas - insanua en la Rumantschia. Organisà da las giuventetgnas per las giuventetgnas.

Furmà comité d'organisaziun

Sco punct pli impurtant da la seduta è vegnì furmà in comité d'organisaziun che sa cumpona da delegads da las regiuns Surselva, Val Müstair, Engiadina, Surmeir e Val Schons ed da represchentants da la GiuRu. Quest comité duai elavurar in concept concret ed entschaiver ad organisar. La festa duai avair lieu la stad 2009.

Guarda qua las fotografias da l'occurrenza

L'uniun da giuventetgna (UdgV; pronunzia: udescheve) preschenta il teater "Hotel Diermabein" a Vuorz. La GiuRu recumanda da visitar il toc umoristic.

Preschentaziuns han lieu las suandantas datas:

sonda 1-11-08, 20.15 cun ustria e bar
dumengia 2-11-08, 15.00
venderdis 7-11-08, 20.15 cun ustria e bar
sonda ils 8-11-08, 20.15 cun ustria e bar (derniera)

La proxima sonda ha lieu la radunanza da delegads da la Lia Rumantscha. Inatractanda vegn ad esser il budget da la Lia Rumantscha per l'onn 2009.Quel prevesa da stritgar a la GiuRu passa in terz da las contribuziuns,numnadamain 14'000 francs. Plinavant èsi era prevì da stritgar al'Uniun per la litteratura rumantscha ed a la Societad Retorumantscha inamassa raps. Per mussar che nus n'essan betg d'accord cun questa politicada finanzas han exponents da las trais uniuns lantschà ina petiziun.

Suttascriva era ti:

www.rumantschia.ch

Chars salids da tia GiuRu

Uschè simpel n'è quai natiralmain betg, perquai stuain nus l'emprim conquistar la bar. Damai: vegnir e gidar!

Dapi ils 28-8-08 s'inscuntran (s'entaupan) mintga gievgia saira «tut» ils rumantschs e «tut» las romontschas da turitg en il „Piccolo Giardino" per inabaterlada. L'idea è dad instituziunalisar ina (gievgia) saira rumantscha a Turitg. I na dat nagin sponsur, nagin jodel e nagins pleds uffizials, persuenter blers discurs profunds rumantschs („Tgi daventa nova directura u nov directur dal Radio rumantsch?") u globals („Prendan atgnamain tutils sportists professiunals doping?") e bler small-talk („gia ditg betgpli vis...! tge fas uschè? nua lavuras?") e tranteren adina puspe ina biera u in magiel aua minerala per rinforzar l'identitad communabla da la diaspora rumantscha.

Chapì l'idea? Anc dumondas? giuru@giuru.ch / 076 393 62 35

Qua lura ils detagls:

Mintga gievgia, 4/11/18/25-09-08 e.u.v. a partir da las 20:00 en il „Piccolo Giardino" (Schöneggplatz 9).

Simplamain prender il bus 31 a la staziun principala (HB) fin la fermada „Militär-/ Langstrasse" e cuntinuar anc 100 meters a pe enla medema direcziun fin che la via fa ina storta, là sa chatta il „Piccolo Giardino".

Nagina tema, nus avain er tema. Simplamain vegnir!
Ans legrain da vesair in pèr fatschas nunenconuschentas e conuschentas turitgès-rumantschas questa gievgia saira!

In plan da la citad cun la «bar rumantscha» / Militärstrasse x Langstrasse / Il Piccolo Giardino

Sche ti audas ina giada insatgi che cloma «glaaatschs da vaniglia, tschigulatta, fraja, mocca...» has ti probablamain chattà la GiuRu!

Dals 31 da matg enfin ils 6 da zercladur ha lieu en Surselva l’EUROPEADA, l’emprim campiunadi europeic da ballape da las minoritads uropeicas (www.europeada2008.net).
Er la GiuRu e las PUNTS èn durant tut l’emna dasper las plazzas ed en ils stadions e venda glatschs, fan canera, recloman e sustegnan ils rumantschs, sperond che la Rumantschia gudognia il titel! Sche er ti avessas veglia da mangiar in glatsch, sustegnair nossa squadra e da sentir l’atmosfera da l'EM gia quest'emna, sche ve en Surselva!

Sche ti vuls savair nua che la GiuRu è u sche ti es en la merda e dovras in taxi (il motto da la GiuRu è «glatschs &
taxi») telefonescha durant tut l’emna al numer 079/390 94 66.

In ulteriur späschel legendar da la GiuRu è la chanzun alternativa al song uffizial per l'europeada (per tut che n'èn betg «balla-balla-balla») «La vusch», chantada dad Ursina Giger.

Finalmain è "Il Quadern" cumparì! Il Quadern è in project che la GiuRu ha realisà ensemen cun la Quarta lingua. Ils set texts en il Quadern èn vegnids scrits da Fadrina Hofmann, Anja Caminada, Chatrina Josty, Tinetta Rauch, Rico Valär, Flurina Badel ed Arno Camenisch. Els avevan gudignà in'ocurrenza da texts, a la quala 20 giuvens scribents avevan prendì part.

Detagls ed infos, nua ch'ins po retrair il quadern, chattas painprest qua.

"Voices of Europe 2008”, uschia sa numna il project da la GCEE che vul manar ensemen giuvens e giuvnas da tut l’Europa en in champ da chor. Sut la direcziun d’in Dirigent professiunal han ils participants la pussibilità d’exercitar in’emna en differentas linguas e cun differentas minoritads e perfin da dar in ni tschel concert.

Il “Voices of Europe” ha lieu quest onn tranter ils 11 e 18 d’avust a Bautzen tar la minoritad dals Sorbs en Germania.

Has survegnì interess o vuls avair anc dapli infurmaziuns – sche t’annunzia tar nus:
giuru@giuru.ch.

Finalmain èn ellas qua: Las fotografias da la radunanza generala 2008 da la GiuRu.

Guarda sut: fotografias > RG 08 tren

Merci a Clau Dermont per las fotografias.

La davosa fin d’emna ha gì lieu la radunanza generala da la GiuRu. Cun il tren èn tut las participantas ed ils participants viagiai davent da Scuol fin a Sumvitg. La suprastanza ha preschentà ils projects per ils onns 2008/2009. Ensemen cun ils GiuRuists preschents èn intginas ideas vegnidas concretisadas.

La GiuRu ha planisà tranter auter suandantas occurrenzas per il(s) proxim(s) onn(s):

• participaziun als seminaris da la {cms_selflink page='64' text='GCEE '}
• in workshop da musica
• in curs da rumantsch al sufo
• activitad a l’Europeada
• L’emprim OpenAir da giuventetgnas

In cordial engraziament a tut ils GiuRuists ch’èn sa participads sco era ad Urs Cadruvi che ha bandunà pli baud la radunanza generala da la Surselva Romontscha per pudair tschanar cun la GiuRu.

Questa fin d’emna èn 11 commembers da la GiuRu sa rimnads en ina tegia sur Ardez per entschaiver en cumpagnia in onn che porta ina massa lavur. Sco ch’i tutga tar ina tal’occurrenza, ha il president tegnì in pled d’avertura:

“Hallo”

Suenter ina saira, durant la quala la suprastanza da la GiuRu ha chattà blers gidanters per l’eventual GiuFeRu, è l’entira banda la proxima damaun sa rendida cun scarsola da la val giuadora.

La GiuRu giavischa a tut ils commembers in bun onn nov e sa legra sin la proxima occurrenza – la radunanza generala che duai era vegnir speziala quest onn.

E qua chattas las fotografias

Battaporta ha presentà l’emna passada in nov servetsch: il chalender d’occurenzas. La GiuRu aveva sezza purschì in tal servetsch sin www.giuventetgna.net. Uss n’è quel betg pli necessari, la GiuRu collavura cun battaporta. E finalmain han la rumantschia e las uniuns da giuventetgna IN chalender COMMUNABEL e GRATUIT. Perfetto, u?

Las adressas da contact da las uniuns da giuventetgna ch’eran era d’anflar sin www.giuventetgna.net èn uss sin www.giuru.ch en la rubrica „uniuns da giuventetgna“ (per actualisaziuns essan nus adina engraziaivels) ed il chalender d'occurenzas chatt'ins gist dasperas.

Grazia a tut ils utilisaders fidaivels da www.giuventetgna.net, tar il battaporta essas vus en buns mauns!

La GiuRu è stada preschenta al bal da maruns a Zernez ed ha vendì maruns.

Qua pos guardar ina contribuziun dad En-TV.

La GiuRu porscha en collavuraziun cun la Lia Rumantscha a giuvenils la pussaivladad dad emprender Rumantsch Grischun (RG).

Dapli infurmaziun chattas en la rubrica 'projects'.

Finalmain ha il sulet chantun triling da la Svizra ina lescha da linguas che guarda che questa trilinguitad resta in tratg caracteristic da noss chantun. Questa decisiun ha la populaziun grischuna prendì cun ina maioritad da 54%. La GiuRu è fitg levgiada da questa decisiun en favur dal futur rumantsch, dal futur da la giuventetgna.

- www.ja-gea-si.ch: l'acziun da la GiuRu
- www.triling.ch: il comité uffizial per la lescha da linguas

Il successur da Chatrina Josty che ha manà la GiuRu ils ultims quatter onns, sa numna Oliver Nyffeler. El è vegnì elegì la sonda passada, ils 20 da schaner da la radunanza generala da la GiuRu.

Cun al demissiun da Pia Valär ha la suprastanza en pli stuì ir a tschertga da dus novs suprastants. Sco actuara è vegnida elegida Annatina Nay, che ha gia rimnà experientschas giuruisticas durant la collavuraziun en divers projects, ed Anna Rauch, in num anc nunenconuschent en la Rumantschia, sco nova assessura. Il nov cassier è Gion-Andri Cantieni, che aveva durant ils ultims onns l’onur da scriver protocols.

Sin questa via vul la nova suprastanza engraziar anc ina giada cordialmain tar Chatrina e Pia. Nus sperain ch’ellas stettian er activas en l’avegnir.

In cordial grazia fitg er a noss commembers. Sin in onn plain projects innovativs ed in gronda participaziun.

La GiuRu envida tut ils commembers ils 2. da december 2006 ad in di da svidatesta.

La GiuRu tschertga texts per il nov project “Il Quadern - zweisprachige Texte aus der jungen Rumantschia“.

Sa participar pon tut ils giuvens rumantschs che èn betg pli vegls che 30 onns (annada 1976).

La Giuventetgna Rumantscha sco uniun politicamain neutrala (tenor art.60 ss. dal cudesch civil svizzer) ha ina greva posiziun en temps dal campiunadi mundial. Nus na dastgain betg sustegnair l’equipa naziunala!

Per quai motiv ans essan nus decidì da mussar nossa simpatia entras ina pitschna adattaziun dal logo.

Quai è stà il motto dal seminari da Pasca (SePa) 2006 da la GCEE (www.yeni.org).

Puspè ina giada s’han inscuntrads dapli da 100 giuvenils da minoritads da tut l’Europa ad in seminari, questa giada è il seminari vegnì organisà da la GJU, da la “Gemeinschaft Junger Ungarndeutscher” a Pécs, Fünfkirchen, en l’Ungaria dal sid. Era quatter GiuRuists èn stads da la partida: Chatrina Josty (ch’è en il medem mument era la vicepresidenta da la GCEE), Oliver Nyffeler, Gion-Andri Cantieni ed Annatina Nay. Entaifer in’emna ha la delegaziun da la GiuRu intervegnì bler sur da la moda da viver e las circumstanzas da viver da la minoritad tudestga en Ungaria. La dumengia d’elecziuns dal parlament ungarais ha gì lieu durant il seminari e quai è, sco la nova lescha ungaraisa per las minoritads era stà in tema ch’è vegnì tractà al seminari.

Ultra da quai s’han ils participants era fatschentads cun ina da las pli grondas minoritads en l’Europa, numnadamain cun ils Roma. Il tema Roma è medemamain in dals temas centrals per la GCEE. Durant il SePa 2006 ha perquai gì lieu in lavuratori cul tema Roma ed igl è tranter auter vegnì mussà in film sur da Romas ch’han fatg carriera. Pregiudizis e realitad era suenter il tema da la discussiun cun il reschissur.

En il barat cun autras minoritads, en il stgomi cun giuvenils da tut l’Europa ha la GiuRu puspè rimnà in per bunas ideas ed ha novas purschidas per vus:

European Trainer Seminar, dals 10 als 13 d’avust 2006 a Christianslyst (en vischinanza da Flensburg, Germania), organisà da la SdU (Sydslesvigs danske Ungdomsforeninger)

Il seminari sa fatschenta cun dumondas da manar in’organisaziun e discutescha cuntegns tematics. L’offerta sa drizza a glieud ch’è activa sco manader en in’uniun (p.ex. uniun da giuventetgna), per glieud tranter 18 e 35 onns. Il seminari ha lieu en englais, ca. 30 persunas pon participar, custs ca. 150.- Has interess? Per l’annunzia e dapli infos scriva a giuru@giuru.ch (Nus pudain en cas era organisar il viadi e dain vinavant ti’annunzia. Deadline 1-6-06)

Sports & Culture in Dialogue, dals 28 zercladur als 2 da fanadur 2006 a Haderslev, Danemarc
Sin il program è bler sport ma era discussiuns tranter giuvenils che appartegnan a minoritads etnicas da l’Europa cun giuvenils da las “maioritads”. Al seminari participeschan ca. 40 000 giuvenils, ina grondiusa schanza per preschentar il Rumantsch a tantas persunas! Nus spetgain anc ina contribuziun finanziala. Sche questa vegn garantida, paja mintga participant mo ca. 150 francs.
Annunzias ed infos datti qua: giuru@giuru.ch. Deadline 15 da matg 2006

Nus lavurain dentant era a chasa, en elavuraziun è in quadern cun litteratura giuvna en rumantsch grischun e tudestg… detagls suondan.

Per infos e dumondas avain nus adina respostas: el cudesch da giasts ni sur giuru@giuru.ch.

Il hailait! La radunanza da la GiuRu ha lieu quest onn ils 11 da mars 2006 sin territori rumantschischem, a Trun. Betg “sut il Ischi” ma en il Hotel Dulezi. La radunanza cumenza a las 17.00. Suenter la radunanza datti tschaina ed in program vast organisà da la giuventetgna da Trun cun turnier da tschutti e cun in super concert da la nova band rumantscha “Pobufibanox” (entrada libra per ils commembers da la GiuRu).

Tgi che dovra in letg quella saira duai trametter in mail a giuru@giuru.ch.

La dumengia vargada, ils 16 d' october èn ils participants dal seminari d' atun "Inscunter" da la GCEE puspè partids da Laax. I era huara gail.

Fotos èn da chattar qua.

Emblida St.Gallen, il Gurten, Montreux. Va a Trun!

Malgrà tut las datas faussas els newsletters da la GiuRu ha quest event lieu ils 9 da fanadur sin il plaun Rensch a Trun. GiuRuists survegnan rabat!

dapli sin www.giuventetgnatrun.ch

La SdU (l’organisaziun da la minoritad danaisa en Germania) organisescha ils 2 - 6 d’avuost 2005 la ‘Sternwattwanderung’. Vul dir: turas tras il enconuschent ‘Wattenmeer’, in pau festa e giudair la stad ina giada in pau auter. Infos sut www.yeni.org . Interess? T'annunzia: giuru@giuru.ch.

«Posta rumantscha» è nagut auter che ina glista d'adressas da mail. Sche ti t'annunzias, è era ti'adressa sin la glista. Ti survegns mails da tuts e sas scriver a tuts che fan part da la glista.

Per abunar la "posta-rumantscha" e savair communitgar cun 534 auters rumantschs, visita simplamain www.posta.giuru.ch!

Questa fin d'emna ha gì lieu in vörcschop da scriver, organisà da la GiuRu. Nov participants - clima famigliar garantì - han scrit racris (raquints criminals u crimis) cun Göri Klainguti a Samedan.

Göri Klainguti, scriptur, pur e simplamain cool, ha explicà sco el proceda cun scriver in gieu auditiv. Vinavant ha el gia tradì intgin misteri davart ses cudesch "L'ü" anc betg publitgà .

L'idea è da registrar ils racris ed emetter quests in bel di sin radio gonda. Mo emprim ston els anc vegnir scrits a fin. Avant che insatge vegn registrà , vegn puspè infurmà ed alura pon puspè tuts sa participà äh sa participar.

Tge capita cun la GiuRu suenter la restructuraziun da la Lia Rumantscha? Ils 29 da schaner, las 16:00 ha lieu la radunanza generala da la GiuRu a Cuira en la Hofkellerei. Envidads èn GiuRuists, Puntists, schurnalists, artists ed auters mists, äh interessadas. Suenter la radunanza vegn maglià.

Vegnì!

Al seminari da Pasca vain nus entupà in pèr lustigs Occitans. (quai è ina minoritad latina en il sud de la France.) L'occitan è in cool linguatg - ins chapescha!!!! Geil! E perquai fa la GiuRu visita als occitans questa stad. Per tuts che na san vegnir (displaschaivlamain san els envidar mo quatter persunas) qua il ultimativ curs Rumantsch-Occitan:

Quai è quasi la GiuRu da la minoritad danaisa en Germania. (Simplamain bler bler extrem pli gronda…) L’emna avant Pasca è ina delegaziun da la GiuRu (Marina Cadonau, Annatina Dermont, Oliver Nyffeler e Chatrina Josty) stada sin visita sil Nord, quai en rom dal seminari da Pacua da la GCEE (mira sin homepage tge che quai è!) Sper il far workshops, also l’emprender sur da la cultura dals wikingers ed uschia vain nus simplamain giudì il temp cun noss amis da l’Europa.

Per tut quels che sentan ch'els han el sang il filmar mo han nagina camera, per tut quels che sentan ch'els èn naschids sco acturs, mo chattan nagin um da camera, per tut quels che vulan emprender d'enconuscher Marietta Jemmi ni Daniel Candinas e per tut tschels interessai dal film organisescha la GiuRu ils 21/22 da zercladur ina fin d'emna da film a Scuol!
Ils 8-11 d'october ha lieu il 'Festival dal film rumantsch' a Glion. Enfin ils 1. d'avust san films anc vegnir inoltrads: in motiv dapli da sa participar!

T'annunzia uschè spert sco pussaivel, ma sin il pli tard enfin ils 16 da zercladur cun il formular 'annunzia' sut 'PROJECT'.

Dapli infurmaziuns:
www.mariettajemmi.ch
www.movie-encarden.ch
giuru@giuru.ch

Suenter che la GiuRu ha infurmà dus onns ditg davart il festival da film a Suraua (2001) ed auters temas sumegliant actuals, è la GiuRu puspè presenta en l'internet. Igl ha custà in pèr uras temps ed in pèr chistas biera spesas, be uss è il grond mument qua.

Jau vuless sco emprim sa perstgisar tar ils layoutists da la pagina veglia. Els possian perdunar che nus avain dischlocà lur pagina en direcziun deponia. Mo ord resguard sin tut ils visitaders che n'han betg Flash essan nus sa decidì per questa schliaziun. Nus avain remplazzà ina bella pagina entras ina ch'ins sa duvrar.

I vivi la Giuventetgna Rumantscha!