Las actualitads tar la GiuRu

Tranter ils 12 ed ils 18 da settember ha lieu in'ulteriura giada il seminari d'atun da la GCEE (giuventetgna da cuminanzas etnicas europeicas) a Bleiburg / Pliberk tar ils Slovens en Carinzia, Austria. Il seminari stat sut il tema „We Do Not Fear. Minorities against Social Exclusion". A maun da lur atgnas experientschas vulan ils organisaturs sa deditgar a la dumonda, sco che la diversitad culturala e la plurilinguitad influenzeschan la vita dal mintgadi en Carinzia.

Sche ti has interess d'emprender d'enconuscher autras minoritads, da savair sco che questas vivan e funcziunan e da simplamain passentar in'emna incumparabla, scriva sin giuru@giuru.ch u telefona sin 079 390 94 66. En la delegaziun da la GiuRu datti anc dus plazzas libras.

Nus ans allegrain sin tai.

Dapi quest'emna duas gruppas sin viadi da Chancy e Müstair viers Berna. Entaifer tschintg emnas vul il project sensibilisar la populaziun da la Svizra sin la quadrilinguitad da noss pajais. Sin viadi tras l'entira svizra emprendan ils participants ad enconuscher tut las linguas naziunalas. Durant dis da project pon ils viandants e tut ils auters sa revegnir ed emprender insatge da la cultura indigena e locala.

Has gust da ta participar? Ti pos gugent viandar cun las gruppas in per dis e ta participar als dis da project. Dapli infurmaziuns actualas chattas sin la pagina d'internet www.get-together.ch u sin facebook.

Bainprest èsi puspè uschè lunsch: sonda, ils 8 da matg 2010 maina la GiuRu tras il legendar curs da rumantsch per na-rumantschs al SUFO a Son Gagl. Dapi intgins onns preschenta la GiuRu durant trais uras il rumantsch ed la cultura rumantscha per che noss participants che na san anc nagut dal rumantsch possian far ina giada enconuschientscha cun nossa lingua.

Perquai tschertgain nus anc persunas che avessan gust da giugar in di magistra u magister ed vegn cun nus a Son Gagl a preschentar il rumantsch? Has gust? Ans scriva in e-mail a giuru@giuru.ch u t'annunzia per telefon u SMS a 077 / 429 94 42.

Tranter las quatter regiuns linguisticas da la Svizra datti differenzas e medemamain convergenzas, ma tgeninas èn quai per il mument? Co stat la generaziun d’ozendi visavi il fenomen da la plurilinguitad? Vegn la diversitad linguistica plitost vesida sco ritgezza u sco impediment? Co sa mussan schanzas ma er impediments per il futur? Il project Get-Together vuless ir suenter a questas dumondas e promover l’enclegientscha tranter las quatter regiuns linguisticas cun purtar ensemen glieud giuvna da tuttas parts dal pajais e d’als animar da discutar ensemen questa tematica.

Dal 12 da fanadur fin il 15 d’avust 2010 vegnan duas gruppas da viandants, messas ensemen da represchentantAs da las parts rumantschas, talianas, franzosas e tudestgas da la Svizra, a traversar tuttas quatter regiuns linguisticas a pe. Partent da Chancy (GE) e da Müstair (GR) vegnan sin via, ensemen cun la populaziun locala, manads tras dis da project che pertutgan il fenomen da quadrilinguitad.

Per questa occurrenza tschertgain nus dentant anc manaders da gruppas. Has ti gust da traversar durant in mais la Svizra e vuls t’engaschar tar l’organisaziun dal project? Lura t’annunzia sco manader da gruppa.

Il termin d’annunzia è vegnì prolungà enfin mez avrigl, t’annunzia pia uss! Ulteriuras infurmaziuns chattas en quest PDF u sin la pagina d’internet: www.get-together.ch.

Ier ha gì lieu la radunanza da delegads da la Lia Rumantscha a Savognin. A quella chaschun ha ella era cumenzà las festivitads per il giubileum da 90 onns. La GiuRu vul gratular a la Lia Rumantscha ed engraziar a tut ils collavuraturs per la buna lavur prestada en ils ultims 90 onns. Suenter trais onns ha Martin Cantieni, noss represchentant en la suprastanza da la LR, demissiunà. Nus vulain prender la chaschun ed engraziar cordialmain a Martin Cantieni per ses grond engaschi!

Sco successur aveva la GiuRu proponì dad eleger Clau Dermont da Rueun, l’actual secretari da las PUNTS. Deplorablamain èn ils delegads betg suandads nossa proposta ed han elegì Jon Carl Tall da l’Uniun da las Rumantscha e dals Rumantsch en la Bassa. Nus al lain tuttina gratular per l’elecziun e giavischar bun success en la suprastanza LR e vulain e il medem mument era engraziar a Clau Dermont per sia prontadad da sa metter a disposiziun sco candidat per la suprastanza.

La GiuRu vegn a discutar intensivamain a la proxima seduta sco che nus vulain collavurar en futur cun la LR. En mintga cas na sa senta ella betg pli represchentada da la suprastanza actuala. Era sche Urs Cadruvi declera live en il Telesguard che quai na saja betg ina gronda sperdita per la giuventetgna: «Sch’ils giuvens vulan puspei metter impuls, lu san els quei buca mo sur la suprastonza. Els san tractandar quei vinavon ella suprastonza, san vegnir a presentar ei e metter en ferm viavon lur vusch. Da leu anora han els piars insumma nuot.» Denton èsi, sco che Vincent Augustin aveva era menziunà durant la radunanza da delegads, savens stà necessari che noss represchentant ha adina puspè e puspè repetì tscherts giavischs enfin che quels èn vegnids udids. Perquai è l’interpretaziun dad Urs Cadruvi faussa ed la giuventetgna ha tuttina pers ier ina massa!

Per finir vul la GiuRu anc ina giada repeter ils giavischs persunals che Martin Cantieni aveva menziunà ier per il futur da la LR. Nus pudain ir fitg d’accord cun quests giavischs, mo agiuntassan nus anc in quart. Quatter puncts, per che la Lia Rumantscha possia era avair success ils proxims 90 onns:

1. Ina LR in zic pli curaschusa.
2. Ina LR in zic pli sperta ed averta.
3. Ina LR in zic pli giuvna.
4. Ina LR pli sincera...

Cun la versiun 3.5 da Mozilla Firefox è era l'emprima giada cumparida la versiun rumantscha dal renomà navigatur.

Telechargia ed installescha anc oz!

Dapli infurmaziuns chattas sin la pagina www.software.rumantscha.ch. Fa era reclama sin Facebook per Firefox rumantsch, ve commember da nossa gruppa!

La banca chantunala grischuna ha emprendì rumantsch! Uss pon ins retschaiver tut ils documents er en rumantsch. Tuts che han in conto tar la gkb pon (e duain) s'annunziar qua:

Gea, jau discur rumantsch

«Debits» na tuna lura betg pli uschè nausch ed «avis da bunificaziun» tuna anc bler meglier che ina Gutschriftsanzeige.

Brava banca!