Rapport annual da la GiuRu 2010

L’onn 2010 ha cumenzà per la GiuRu cun la radunanza generala a Laax en las localitads da la Lia Rumantscha Surselva/CCM. Ils temas principals eran il futur da las PUNTS sco era las elecziuns en la suprastanza da la GiuRu. Ils preschents han elegì Luca Hasler en la suprastanza ed engrazià ad Anna Rauch per il grond engaschi ch’ella ha purtà en la GiuRu durant il temp en suprastanza.

La GiuRu en la regiun…
Era l’onn 2010 ha la GiuRu empruvà da vegnir en contact pli ferm cun las uniuns da giuventetgna localas. Per quai intent era previs dad organisar in turnier tranter uniuns da giuventetgna dal Grischun a Laax a chaschun da la cuppa mundiala da ballapè. Dentant èn la finala uschè pacas uniuns s’annunziadas che l’occurrenza ha stuì vegnir ditga giu. Persuenter ha la GiuRu entschet a visitar uniuns da giuventetgna durant lu radunanzas generala – quai è sa mussà sco fitg effectiv e sto vegnir fatg anc pli savens en futur. Ina autra occurrenza è gia tradiziunala. Sco gia dapi intgins onns è la GiuRu puspè stada preschenta al SUFO a Son Gagl cun in workshop cun il titel «Rumantsch – hier und jetzt». Durant in suentermezdi ha la GiuRu preschentà als circa quindesch participants il rumantsch e demonstrà che nus na discurrin betg d’ina lingua morta. Quai è mintgamai ina occurrenza fitg interessanta e nus ch’ans porscha la pussaivladad da fascinar era glieud che n’ha nagina relaziun cun il rumantsch per nossa lingua. Quest onn ha la GiuRu organisà l'emprima giada in tura da stad. Nus essan viandads l'entschatta settember da Vrin sur la Greina en la Val Sumvitg ed avain passentà dus grondius dis en nossa bella regiun.

…naziunala…
La GiuRu è sa participada gist vid dus gronds projects naziunals: La stad, dals 12 da fanadur als 15 d’avust ha gì lieu il project «Get together». L’idea era da viandar en duas gruppas entras l’entira Svizra e sensibilisar ils participants sco era la populaziun Svizra per nossa plurilinguitad. La GiuRu ha organisà in workshop en l’Engiadina ed in a Cuira ed è era stada preschenta a l’act final sin la plazza federala a Berna; e sa chapescha èn tscherts commembers era viandads cun in tochin. Il settember ha lura anc gì lieu l’«Acziun 72 uras». La GiuRu è era stada tar questa occurrenza en il comité d’organisaziun per il Grischun. Suenter varga in onn e mez lavurs da preparaziun han circa 30'000 uffants e giuvenils mess sutsura l’entira Svizra. La GiuRu è dentant betg be stada da la partida tar l’organisaziun da l’occurrenza; ella è era stada da la partida cun in agen project: Nus avain ramassà en l’entir chantun Grischun las «visiuns rumantschas» da la giuventetgna ed las lavurà si en ina ediziun da las PUNTS.

…ed internaziunala
Sco mintga onn è la GiuRu era stada activa en la GCEE, la Giuventetgna da las Cuminanzas Etnicas Europeicas. Oliver Nyffeler è sco represchentant da la GiuRu en la suprastanza da la GCEE e responsabels per la communicaziun. Era al seminari da Pasca en la Macedonia ed al seminari d’atun a Kärnten en l’Austria è la GiuRu stada preschenta.

PUNTS e sustegns
In grond tema durant l’atun è era il futur da las PUNTS stà. Ord mancanza da persunas engaschadas ed finanzas ha la redacziun da las PUNTS ed la GiuRu stuì decider da publitgar las PUNTS be pli quatter giadas en l’onn 2011. Nus sperain dentant da chattar puspè dapli persunas che s’engaschan per puspè pudair auzar la frequenza da publicaziun. Sco mintga onn ha la GiuRu era sustegnì differents musicists, occurrenzas e publicaziuns durant l’onn.

Mars 2011, la suprastanza