La radunanza generala da la GiuRu, che ha gì lieu ils 11 da mars a Trun era in success cumplain. Circa 25 commembers da la GiuRu eran vegnids a Trun per la radunanza e per il concert e la festa suenter.
La GiuRu ha preschentà ses program annual per il 2006 che cuntegna tranter auter in quader cun giuvna litteratura rumantscha che la GiuRu vegn a realisar en collavuraziun cun la Quarta Lingua. Ultra da chatt’ins sin il program differents lavuratoris, participaziun ad occurrenzas naziunalas ed in’offerta vasta dad occurrenzas internaziunalas. Uschè datti era quest onn puspè seminaris da la GCEE ed la pussaivladad da purtar il chant rumantsch enfin en Russia! Il champ da chant internaziunal « Voices of Europe » ha quest atun numnadamain lieu a Moskau. (interessents visitan la pagina: www.giuru.ch u scrivan a giuru@giuru.ch)

Il secretari da la Lia Rumantscha Gion Antoni Derungs è era stà preschent a la radunanza generala da la GiuRu. El ha discurrì sur da la situaziun finanziala da la Lia che ha era consequenzas per il preventiv da la GiuRu. La GiuRu vegn ensemen cun la Lia ad elavurar in plan per la collavuraziun en avegnir.

La segunda part dal “gailischem event”, la tschaina, il concert e la festa è er stada in success: la band POBUFIBANOX ha fatg talmain il “rocken” ch’igl ha cuzzà magari ditg enfin che tscherts GiuRuists han chattà la via a chasa.