La sonda passada èn delegadas e delegads da 20 uniuns da giuventetgna sa radunads a Cuira per lantschar l'organisaziun dad in inscunter da tut las uniuns da giuventetgna rumantschas. L'uniun Giuventetgna Rumantscha GiuRu aveva envidà tut las uniuns da giuventetgna rumantschas en il Marsöl per discutar las pussaivladads dad ina festa communabla da tut las giuventetgnas. La sonda ha la GiuRu pudì beneventar represchentants da las uniuns dad: Alvaschagn, Andeer, Bever, Breil, Cumbel, Dardin, Donat, Fuldera, Müstair, Riom-Parsonz, S-chanf, Salouf, Segnas-Acletta, Sta. Maria/Valchava, Strada/Martina, Suaraua, Tschierv, Vuorz e Zernez. Il team da la GiuRu che aveva envidà sa mussa «intgantà che tantas uniuns èn sa participadas». Quai motiveschia per organisar ina «festa da dimensiun istorica», «istorica» almain per la Rumantschia.

Passa 90 uniuns da giuventetgna

En tut il territori rumantsch datti passa 90 uniuns da giuventetgna che funcziuneschan tuttas sin nivel communal. Qua e là datti inscunters ed activitads communablas da singulas uniuns forsa perfin sur vals ora. «Ma sch'i reussescha a nus d'organisar in'occurrenza cun uniuns da giuventetgna ord tuttas vals rumantschas, da tut ils idioms, sche fiss quai insatge nov», di Oliver Nyffeler, president da la GiuRu che ha moderà la seduta ensemen cun Annatina Dermont.

La radunanza ha provocà discussiuns intensivas davart la furma da la festa. Il consens ch'ins ha chattà è ch'ins stoppia far «pass per pass», tschentar en il center l'inscunter da las differentas uniuns da giuventetgna, senza dentant sclauder giuvnas e giuvens che n'èn betg commembers dad uniuns da giuventetgna. In model favurisà è in di da gieus u ina concurrenza ed ina notg da concerts da bands rumantschas - insanua en la Rumantschia. Organisà da las giuventetgnas per las giuventetgnas.

Furmà comité d'organisaziun

Sco punct pli impurtant da la seduta è vegnì furmà in comité d'organisaziun che sa cumpona da delegads da las regiuns Surselva, Val Müstair, Engiadina, Surmeir e Val Schons ed da represchentants da la GiuRu. Quest comité duai elavurar in concept concret ed entschaiver ad organisar. La festa duai avair lieu la stad 2009.

Guarda qua las fotografias da l'occurrenza