Statuts da la Giuventetgna Rumantscha (GiuRu)

I Disposiziuns generalas

Art. 1

La Giuventetgna Rumantscha è in'uniun surconfessiunala e politicamain neutrala tenor art.60 ss. dal cudesch civil svizzer.

Art. 2 Intent

La Giuventetgna Rumantscha
* cultivescha e promova il contact tranter la giuventetgna da las differentas regiuns rumantschas ed er da la diaspora
* stgaffescha l'encletga tranter las regiuns rumantschas cun sustegnair e promover las activitads ch'interessan la giuventetgna.
* Tschertga e tgira sin plaun chantunal, naziunal ed internaziunal contacts cun gruppas che han sumegliantas finamiras

Art. 3 Commembranza

Commembras e commembers da la Giuventetgna Rumantscha pon esser persunas natiralas tranter 16 e 35 onns che discurran rumantsch sco era uniuns da giuventetgna rumantschas.

Art. 4 Organs

Ils organs da la Giuventetgna Rumantscha èn:
a) la radunanza generala
b) la suprastanza
c) il revisurat

II Radunanza generala

Art. 5 Cumposiziun

La radunanza generala è l'organ suprem da la Giuventetgna Rumantscha. Ella sa cumpona da:
a) commembras e commembers tenor art.3
b) commembras e commembers da la suprastanza

Art. 6 Convocaziun e lieu da radunanza

La radunanza generala ha lieu mintg'onn. La suprastanza u 10 commembras u commembers pon pretender radunanzas extraordinarias.

Il termin è da communitgar 30 dis avant a las commembras ed als commembers e da publitgar en las gasettas rumantschas. Il lieu vegn fixà da la suprastanza, resguardond las differentas regiuns.

Art. 7 Cumpetenzas

La radunanza generala tracta e fixescha las directivas generalas da l'activitad da la Giuventetgna Rumantscha. Ella elegia la suprastanza, il revisurat ed incumbensads/-adas per eventualas funcziuns spezialas. Ella deliberescha il protocol da la davosa radunanza generala, il rapport annual da gestiun da la suprastanza ed il quint e rapport dal revisurat. La radunanza generala decida davart la contribuziun annuala.

Art. 8 Procedura per elecziuns e votaziuns

Tuttas elecziuns vegnan fatgas cun tscherna averta, nun ch'in/a commember/-bra pretenda in scrutini. Per tuttas elecziuns e votaziuns vala il pli da las commembras/dals commembers preschents/-as.

Art. 9 Admissiun ed exclusiun

Commember/-bra po daventar mintgin/a che sustegna la finamira tenor art.2 e che correspunda a las premissas tenor art.3.
Commembras e commembers che cunterfan a las finamiras da l'uniun pon vegnir exclus/as da la radunanza generala.

III Suprastanza

Art. 10 Cumposiziun ed elecziun

La suprastanza sa cumpona da 5 commembers/-bras:

* President/a
* Vicepresident/a
* Actuar/a
* Cassier/a
* Assessur/a

En suprastanza duess esser represchentada tant sco pussaivel glieud da tut l'intschess rumantsch.
Las persunas en suprastanza vegnan elegidas per 2 onns cun il dretg da vegnir reelegidas.

Art. 11 Incumbensas

La suprastanza è l'organ executiv ed administrativ da la Giuventetgna Rumantscha. Ella represchenta la Giuventetgna Rumantscha, exequescha tut las incumbensas da gestiun e convocescha la radunanza generala.

Art. 12 Cumpetenzas

La suprastanza elegia cummissiuns per incaricas specificas.

Art. 13 Sesidas

La suprastanza vegn convocada dal president tenor basegn u sche trais commembers/-bras giavischan ina sesida. Las decisiuns vegnan prendidas cun la maioritad. En cas da paritad da las vuschs tar las votaziuns ha il president/la presidenta la vusch da tagl.

IV Revisurat

Art. 14 Controlla dal quint

Las duas persunas dal revisurat controlleschan mintg'onn il quint da la Giuventetgna Rumantscha e dattan rapport a la radunanza generala.

V Differentas disposiziuns

Art. 15 Dissoluziun

Sche la Giuventatgna rumantscha avess da sa schliar, duess la facultad restar deponida durant 20 onns tar la Lia rumantscha e vegnir restituida a l'uniun, per cas che quella sa constituiss danovamain. Cas cuntrari duess la facultad vegnir duvrada per autras activitads da la giuventetgna rumantscha.

Art. 16 Vigur e revisiun dals statuts

La radunanza constitutiva da la Giuventetgna Rumantscha ha approvà quests statuts ils 9 d'avust 1991 a Laax. Els entran en vigur cun quest termin. La radunanza generala po reveder quests statuts cun in pli da 2/3 da las vuschs preschentas.